Punësimi i dinjitetshëm dhe rritje ekonomike
Të rrisim punësimin, për rritje ekonomike!
Çdo vend duhet të krijojë shanse dhe kushte të barabarta për punësim të dinjitetshëm. Rritja e punësimit ndikon drejtpërdrejt në uljen e varfërisë, por edhe në barazinë mes rajoneve dhe grupeve të ndryshme sociale.
Duke inkurajuar zhvillimin e qëndrueshëm industrial, inovacionet teknologjike dhe sipërmarrësinë, do të krijohen kushte për punësim të plotë, me masa për zhdukjen e punës së detyruar dhe kushte të dinjitetshme dhe kompensim.
8.1.
Të mirëmbahet rritja ekonomike për kokë banori në përputhje me kushtet kombëtare, dhe veçanërisht të paktën 7 për qind rritje të prodhimit të brendshëm bruto në nivel vjetor në vendet më së paku të zhvilluara.
8.2.
Të arrihet nivel më i lartë i produktivitetit ekonomik nëpërmjet diversitetit, përmirësimit teknologjik dhe inovacioneve, si dhe nëpërmjet fokusimit në realizimin e vlerës së lartë të shtuar dhe sektorëve që nxisin hapjen e vendeve të reja të punës.
8.3.
Të promovohen politika të orientuara drejt zhvillimit që mbështesin aktivitetet prodhuese, krijimin e vendeve të dinjitetshme të punës, sipërmarrësi, kreativitet dhe inovacione, si dhe të inkurajojë formalizimin dhe rritjen e sipërmarrjeve mikro, të vogla dhe të mesme, ndër të tjera, nëpërmjet aksesit në shërbimet financiare.
8.4.
Deri në vitin 2030, të përmirësohet në mënyrë progresive efikasiteti global i resurseve gjatë konsumit dhe prodhimtarisë, si dhe të bëhen përpjekje për të arritur rritje ekonomike pa e shkatërruar mjedisin jetësor, në përputhje me programin kornizë 10-vjeçar për konsum dhe prodhimtari të qëndrueshme nën drejtimin e vendet e zhvilluara.
8.5.
Deri në vitin 2030, të arrihet punësim i plotë dhe produktiv dhe punë e denjë për të gjitha gratë dhe burrat, përfshirë të rinjtë dhe personat me aftësi të kufizuara, si dhe pagë të barabartë për punë me vlerë të barabartë.
8.6.
Deri në vitin 2020, duhet të reduktohet ndjeshëm përqindja e të rinjve që nuk janë të punësuar, që nuk shkollohen arsim dhe nuk janë në trajnim.
8.7.
Të ndërmerren masa urgjente dhe efektive për të çrrënjosur punën e detyruar, për t'i dhënë fund skllavërisë moderne dhe trafikimit të qenieve njerëzore dhe për të ndaluar dhe eliminuar format më të këqija të shfrytëzimit të fëmijëve për punë, duke përfshirë rekrutimin dhe përdorimin e fëmijëve si ushtarë, kurse deri në vitin 2025 t'i jepet fund punës së fëmijëve në të gjitha format.
8.8.
Të mbrohen të drejtat e punëtorëve dhe të promovohet mjedis pune i sigurt për të gjithë punëtorët, duke përfshirë punëtorët migrantë, veçanërisht për gratë migrante, si dhe ato me punësim të pasigurt.
8.9.
Deri në vitin 2030, të zhvillohen dhe zbatohen politika për të promovuar turizmin e qëndrueshëm që krijon vende pune dhe e promovon kulturën dhe produktet vendase.
8.10.
Të forcohet kapaciteti i institucioneve financiare vendase për të inkurajuar dhe zgjeruar aksesin në shërbime bankare, të sigurimeve dhe financiare për të gjithë.
8.A.
Të rritet mbështetja për tregti e vendeve në zhvillim, veçanërisht vendet më së paku të zhvilluara, edhe nëpërmjet Kornizës së Integruar të Forcuar për Rritjen e Asistencës Teknike të Tregtisë për vendet më së paku të zhvilluara.
8.B.
Deri në vitin 2020, të zhvillohet dhe të vihet në funksion një strategji globale për punësimin e të rinjve dhe zbatimi i Paktit Global të Punës të Organizatës Ndërkombëtare të Punës.