Важноста на соработката и партнерството во остварувањето на Целите за одржлив развој подразбира заемна одговорност и солидарност, постојана размена и експертиза за да се осигура целосно остварување на целите, кои се патоказ до еден подобар свет за сите.
Со меѓусекторската соработка се поттикнуваат и промовираат ефикасни јавни, јавно-приватни и партнерства со граѓанскиот сектор, засновани врз искуства и партнерски стратегии за обезбедување ресурси.
Владата има важна и водечка улога во делот со креирање политики и закони базирани на наодите и препораките за потребите на конкретни ранливи групи и категории, но реализацијата на Агенда 2030 зависи од секој од нас, од придонесот на секој чинител, поаѓајќи од секој од нас како граѓани, а понатаму на цела мрежа од чинители.
Досегашните иницијативи реализирани со платформата придонесоа кон вклучување на разни чинители, од различни сектори. Инцијативите покажаа дека моќта на здруженото делување и креирање партнерства овозможува заедницата да остварува конкретни цели и чекори од Агендата 2030, преку искористување на сопствените ресурси.
Граѓанскиот сектор, односно граѓанските иницијативи и нивната вклученост е особено важна за идентификување на предизвиците, прибирање податоци за состојбите на терен и следење на постигнувањата, особено најранливите категории, преку застапување и обезбедување услуги. Граѓанските организации работат на подобрување на околината во која делуваат, во која нивните слободи се почитувани и обезбедени, да се стремат кон финансиска стабилност и одржливост, дијалог и партнерски однос со различни чинители кои придонесуваат во реализацијата на целите за одржлив развој. Академската заедница е еден дел од граѓанскиот сектор кој може да придонесе со сопствените ресурси во поддршка за иницијативи. Успешен пример за соработка е проектот „Наша тезга“ на „Рурална коалиција“ во кој се вклучи академската институција ФИНКИ со поддршка преку изработка на веб платформата.
Клучно за меѓусекторската соработка е вклучувањето на бизнис заедницата, претставена од индивидуалци и компании од приватниот сектор. Делувањето на бизнис заедницата има големо значење поради влијанието што го имаат врз економскиот развој, животната средина, работната сила, енергијата, животниот стандард. Со земање активно учество во остварувањето на Целите за одржлив развој, компаниите се промовираат како општестевено-одговорни чинители кои ќе донесат корист за општеството, во исто време се развиваат на принципите на одржлив бизнис. Одличен пример за меѓусекторска соработката е проектот „Бизнис без корупција“, во кој земаа учество компании и професионалци, а од кој понатаму произлегоа прирачници, ресурси и интерактивни алатки на веб страницата www.bezkorupcija.mk.
Општините и општинските совети имаат значајна улога во локализацијата на Целите за одржлив развој. Преку партнерствата и реализацијата на иницијативи заедно со граѓанскиот и приватниот бизнис сектор, општините преку препораките и мерките добиени од социјалните мапирања изработуваат или ги дополнуваат социјалните акциски планови, со кои се остваруваат конкретни цели согласно ранливите категории. Позитивен пример за општина која има направено чекор понапред од останатите општини е Битола, која препораките и мерките ги има вклучено во Социјалниот план 2021 – 2024, како долгорочен план за справување и реализација на целите за одржлив развој кои ги таргетираат лицата со попреченост.
Потврда за одлична меѓусекторска соработка меѓу повеќе чинители од секој сектор е инцијативата „Наша тезга“ на граѓанската организација „Рурална коалиција“, во кој активно се вклучија компании донатори, општини, но и академски институции, ИТ компании кои помогнаа со својата експертиза во форма на про боно поддршка, во исто време промовирајќи се како општествено-одговорни компании.